ភ្នំពេញ៖ រដ្ឋមន្ត្រីក្រសួងមហាផ្ទៃ អភិសន្តិបណ្ឌិត ស សុខា បានសម្រេចបណ្តេញមន្ត្រីនគរបាលចំនួន៤រូបទៀតចេញពីក្របខណ្ឌមន្ត្រីនគរបាលជាតិ ដោយមូលហេតុ ល្មើសវិន័យរបស់កងកម្លាំងនគរបាលជាតិ។ នេះបើតាមសេចក្តីប្រកាសចុះនៅថ្ងៃទី១៨ ខែមករា ឆ្នាំ២០២៤។
មន្ត្រីនគរបាលទាំង៤រូបដែលត្រូវបណ្តេញចេញពីក្របខណ្ឌ សុទ្ធតែជាអនុប្រធានលេខាធិការដ្ឋានទាំងអស់ រួមមាន លោក ទូច យុទ្ធា លោក តាំង គង់ លោក ជូ ផល្លីឌីន និងលោក ខៃ វណ្ណៈ។
ក្នុងសេចក្តីប្រកាសបញ្ជាក់ថា ប្រាក់បៀវត្ស និងរបបឧបត្ថម្ភផ្សេងៗត្រូវបានកាត់ផ្តាច់ និងលុបចេញពីក្របខណ្ឌមន្ត្រីនគរបាលចាប់ពីខែមេសា ឆ្នាំ២០២៤នេះតទៅ។
គូសបញ្ជាក់ថា មន្ត្រីនគរបាលជាច្រើននាក់ហើយដែលត្រូវបានបណ្តេញចេញពីក្របខណ្ឌជាបន្តបន្ទាប់ ដោយសារមូលហេតុល្មើសវិន័យរបស់កងកម្លាំងនគរបាលជាតិ។ ជាមួយគ្នានេះមន្ត្រីនៅក្រោមឱវាទរបស់ក្រសួងមហាផ្ទៃជាច្រើនរូបទៀតក៏ត្រូវបានក្រសួងដកតំណែងផងដែរដោយសារជាប់ពាក់ព័ន្ធនឹងគ្រឿងញៀន៕
